O BNG de Monforte levou ao último pleno municipal dúas iniciativas centradas na recuperación patrimonial e na revitalización de espazos históricos da cidade. A primeira delas reclamou á Dirección Xeral de Patrimonio Cultural unha actuación integral sobre a muralla medieval, mentres que a segunda puxo o foco na recuperación e reorganización do recinto do mercado gandeiro.
A moción relativa á muralla saíu adiante por unanimidade. O BNG advertiu do deterioro que presenta este elemento histórico, malia contar coa protección de Ben de Interese Cultural e formar parte do Conxunto Histórico-Artístico de Monforte. O portavoz do BNG, Emilio J. Sánchez, defendeu a necesidade de pasar “das declaracións ás actuacións concretas” para conservar un espazo que considera fundamental para a memoria histórica e cultural da cidade.
Tamén se debateu unha proposta para impulsar novos usos no campo da feira. A iniciativa apostou pola rehabilitación das antigas instalacións vinculadas ao gando e pola creación dun plan que permita destinar o recinto a mercados, eventos comerciais e actividades ligadas ao rural. A moción obtivo o apoio de PP, BNG e Esperta Monforte, mentres o PSOE optou pola abstención.•
Cargando ...
