O Xeoparque Montañas do Courel sede da segunda edición do campionato de voos de parapente

O Xeoparque Montañas do Courel acollerá de novo un campionato de voos de parapente a longa distancia promovido polo Club Parapente Quiroga. A segunda edición introduce cambios no regulamento para ampliar a participación e dar prioridade aos despegues realizados desde o municipio de Quiroga. O certame contará con tres categorías: maior distancia percorrida desde os despegues de Quiroga, Folgoso do Courel ou Ribas de Sil; maior número de horas de voo acumuladas e maior altura alcanzada dentro do territorio; e mellor reportaxe fotográfica dos voos realizados no Xeoparque.
A competición desenvolverase entre o 1 de xuño e o 10 de setembro. As persoas participantes deberán dispoñer de seguro federativo ou de accidentes e contar con radiocontrol contratado para este tipo de actividades. Para validar os resultados, será necesario presentar tracks que acrediten distancias, tempos e puntos de despegue e aterraxe. Un xurado composto por tres ou catro membros emitirá o fallo final, que será inapelable. Os premios para os tres primeiros clasificados serán de 500, 300 e 200 euros, seguindo o modelo da edición anterior.
O Club Parapente Quiroga segue a impulsar esta práctica deportiva no sur da provincia.•