A plataforma veciñal Salvemos O Malecón reclamou esta semana a dimisión do alcalde de Monforte, José Tomé, ao considerar que utilizou “documentación enganosa” nun vídeo difundido polo Concello sobre o proxecto da nova ponte. O colectivo sostén que no minuto 3:50 da gravación o rexedor presenta como definitiva unha infografía pertencente a unha proposta descartada no concurso celebrado en 2020.
Segundo denunciou a plataforma, a imaxe empregada correspondería ao proxecto denominado Camiños da Ponte Nova, que non resultou gañador no proceso de selección. O colectivo considera que esa recreación ofrece unha visión “máis lixeira” da infraestrutura e non coincide coa solución finalmente elixida, denominada Mercedes.
Salvemos O Malecón asegura que esta situación reforza as súas críticas ao impacto urbanístico da actuación prevista na contorna do paseo fluvial. Entre outros aspectos, cuestiona a altura do futuro vial, a afectación á arborado e a ampliación da superficie destinada ao tráfico rodado. A plataforma tamén dubida da tramitación seguida diante de Patrimonio Cultural e sostén que o proxecto definitivo non estaba pechado cando se emitiron os primeiros informes.
A entidade anunciou ademais a presentación dunha solicitude de peritaxe ante o Colexio Oficial de Arquitectos de Galicia co obxectivo de verificar a documentación utilizada no debate público arredor da ponte. Paralelamente, trasladou un escrito á Dirección Xeral de Patrimonio Cultural para pedir aclaracións sobre o proceso administrativo.
O colectivo lembrou tamén que nas últimas semanas organizou actos informativos e participou na difusión de material crítico co proxecto, nun contexto de crecente debate político e social arredor da futura conexión sobre o río Cabe.•
Cargando ...
