A explanada da piscina cuberta municipal de Sarria acolle desde a pasada semana a exposición fotográfica A lingua do futuro. O futuro da lingua, unha proposta da fotógrafa e docente Alba Díaz centrada na reflexión arredor do uso social do galego entre as novas xeracións. A mostra reúne unha vintena de retratos en branco e negro de nenos e nenas que, malia medrar nun contexto de descenso de falantes, manteñen o galego como lingua habitual.
As imaxes presentan primeiros planos acompañados de referencias simbólicas relacionadas coa cultura galega, desde nomes de artistas ata palabras vinculadas coa natureza, os afectos ou o territorio. A autora procura transmitir a relación da infancia coa lingua e chamar a atención sobre os cambios sociolingüísticos actuais.
Na inauguración participou o vicepresidente da Deputación, Efrén Castro, quen destacou o valor de levar este tipo de iniciativas a espazos públicos e de convivencia.
A exposición permanecerá aberta ao público durante un mes, cun formato pensado para favorecer a difusión e o contacto directo coa cidadanía.•
Cargando ...
