A Vicepresidencia da Deputación de Lugo presentou a segunda edición da Semana do Patrimonio Invisible, unha iniciativa que regresa tras a boa acollida do pasado ano e que busca achegar ao público espazos históricos e culturais que, pola súa natureza, permanecen fóra dos circuítos turísticos habituais. O programa desenvolverase os días 6, 7, 13 e 14 de xuño e inclúe 12 localizacións e 32 visitas guiadas, sumando un total de 505 prazas dispoñibles.
A deputada Iria Castro explicou que o obxectivo é “descubrir recursos patrimoniais pouco coñecidos e convidar a mirar con outros ollos lugares que temos preto”. A responsable provincial destacou tamén a importancia de promover o coñecemento da diversidade patrimonial e de sensibilizar sobre a conservación destes bens.
Na comarca de Lemos, Monforte incorpora ao programa o Pozo da Neve de Piñeira, unha estrutura do século XVII vinculada aos Condes de Lemos que se abre ao público por primeira vez. A visita permitirá coñecer o funcionamento deste antigo depósito de xeo, empregado con fins medicinais e posteriormente como adega.
En Chantada, o itinerario inclúe o Encoro de Belesar, unha das maiores centrais hidroeléctricas de Galicia. A actividade permitirá acceder ao interior da infraestrutura e comprender o seu papel no desenvolvemento enerxético da Ribeira Sacra.
En Taboada, o programa detense no Pazo e igrexa de San Pedro de Bembibre, un conxunto histórico que permite achegarse ao antigo condado de Taboada a través do pazo-fortaleza do século XV e da igrexa románica onde repousan varios dos seus señores.
Pola súa banda, O Incio incorpora a Fonte do balneario da Ferrería, parte dun antigo hotel balneario de finais do século XIX coñecido polas súas augas ferruxinosas. A visita inclúe un percorrido pola aldea e o acceso á fonte histórica.
As inscricións abriranse o 28 de maio ás 12:00 horas na plataforma oficial patrimonioinvisible.gal. As visitas serán gratuítas, en grupos reducidos e con reserva previa obrigatoria, permitindo combinar dous percorridos na mesma xornada.•
Cargando ...
