A programación inclúe actividades gratuítas arredor da paisaxe, a creación artística e a cultura da auga
O Consorcio de Turismo Ribeira Sacra abriu o prazo de inscrición para participar no Laboratorio de Experiencias, unha nova proposta que se desenvolverá entre o 23 de maio e o 28 de xuño en distintos puntos do territorio. A iniciativa forma parte do Plan de Sostibilidade Turística en Destino e busca testar actividades que poñan en valor a identidade, a paisaxe e a creatividade da Ribeira Sacra.
O programa estrutúrase en catro grandes liñas temáticas. A primeira, Artes na Ribeira, inclúe obradoiros de danza, música, pintura, escultura e teatro, con participación directa do público. A segunda, Auga activa, propón rutas interpretativas, sendeirismo combinado con kaiak, barranquismo xeolóxico e actividades vinculadas á minería histórica ou á pesca.
A terceira liña, Buses experienciais, ofrece percorridos en autobús para coñecer explotacións agrogandeiras, proxectos produtivos e talleres de artistas. A cuarta, Cultura da auga, afonda na memoria tradicional, nas lendas e na arquitectura vinculada á auga, con propostas arredor de muíños, mitoloxía, mosteiros e transformacións da paisaxe.
As actividades desenvolveranse ao longo de seis fins de semana consecutivas, combinando accións culturais, deportivas e divulgativas. Todas son gratuítas e inclúen, cando é necesario, desprazamentos, comida ou petiscos e un pequeno agasallo para as persoas participantes.
O Consorcio destaca que o Laboratorio de Experiencias nace nun momento clave, coincidindo coa candidatura da Ribeira Sacra a Patrimonio Mundial da UNESCO, que será resolta en xullo de 2026. A programación pretende ofrecer unha visión máis próxima e participativa do territorio, reforzando a conexión entre visitantes, comunidade local e recursos naturais
As inscricións xa están abertas a través das canles oficiais do Consorcio ata completar prazas.•
Cargando ...
