O calendario de execución abrangue dúas fases entre 2025 e 2029, coincidindo con tres campañas de vendima consecutivas
O Fondo Español de Garantía Agraria fixo pública a resolución definitiva das axudas destinadas a Grupos Operativos Supraautonómicos da AEI-AGRI, dentro do Plan Estratéxico da PAC. Entre os proxectos aprobados figura PENVITIS+, centrado na modernización da viticultura en forte pendente e dotado cun financiamento de 599.238,85 euros. A iniciativa abrangue actuacións en Galicia, Canarias e Cataluña, territorios onde a viticultura heroica mantén un peso significativo e afronta retos derivados do cambio climático, da falta de relevo xeracional e do incremento de pragas.
O proxecto aposta pola incorporación de ferramentas dixitais, modelos predictivos baseados en intelixencia artificial e prácticas de manexo sostible do solo. Tamén contempla o uso de drons para reducir o esforzo físico nas tarefas fitosanitarias e mellorar a eficiencia dos tratamentos. A resolución establece que o financiamento procede integramente de fondos públicos, cun 80% achegado polo FEADER e o 20% restante pola Administración Xeral do Estado.
A participación galega é relevante, especialmente a través de Adegas Moure, con sede en Escairón, que achegará parcelas en pendente como espazos piloto para ensaios de predición de enfermidades e aplicación de tratamentos con drons. A Denominación de Orixe Ribeira Sacra asumirá labores de comunicación e organización de xornadas técnicas, aproveitando a súa experiencia nun territorio recoñecido internacionalmente pola súa viticultura heroica. A EVEGA, dependente de AGACAL, será a encargada de validar os modelos predictivos e avaliar a eficacia das novas tecnoloxías.
PENVITIS+ estrutúrase arredor de tres obxectivos principais: mellorar a calidade enolóxica mediante prácticas de manexo vexetal, anticipar incidencias de pragas cun sistema dixital avanzado e reducir o tempo de traballo manual grazas á automatización. O consorcio está formado por doce entidades das tres comunidades participantes, con INNOVI como representante.
O calendario de execución abrangue dúas fases entre 2025 e 2029, coincidindo con tres campañas de vendima consecutivas. O presidente da DO Ribeira Sacra, Antonio Lombardía, destacou que o proxecto “supón un impulso decisivo para a innovación e a sostibilidade nos viñedos en pendente da Ribeira Sacra”.•
Cargando ...
