O Ciclo Mestre Mateo volverá este ano á provincia de Lugo cunha programación que chegará a oito concellos sen salas comerciais, entre eles Sarria, Taboada e A Pobra do Brollón. A iniciativa, promovida pola Academia Galega do Audiovisual co apoio da área de Cultura da Deputación, mantén o obxectivo de facilitar o acceso ao cinema galego actual fóra dos circuítos habituais. A nova edición foi presentada pola deputada Iria Castro e pola integrante da directiva da Academia Lucía Regueiro. O calendario incluirá sesións na Fonsagrada, Foz, A Pobra do Brollón, Monterroso, Taboada, Meira, Sarria e Vilalba, coa colaboración de concellos e entidades culturais encargadas de organizar as proxeccións en auditorios ou espazos asociativos. O público poderá ver oito títulos recentes do audiovisual galego: Sirât, As liñas descontinuas, Antes de nós, San Simón, 360 curvas, O son da nova regueifa, Deuses de pedra e O silencio herdado. A selección combina longametraxes, documentais e propostas premiadas ou finalistas dos Mestre Mateo, con presenza de profesionais vinculados ás comarcas lucenses. Desde a súa posta en marcha en 2022, o ciclo consolidouse como unha das iniciativas culturais con maior implantación territorial na provincia. Nos últimos catro anos celebráronse 232 sesións, con 40 películas programadas e 6.010 espectadores. Para a Deputación, estes datos avalan unha fórmula que abre novas vías de difusión para as producións en galego e achega as películas a públicos sen acceso habitual a salas. A Academia Galega do Audiovisual destaca tamén a importancia de reforzar a conexión entre a cidadanía e o cinema que se fai en Galicia. O ciclo busca, nese sentido, ofrecer unha programación próxima e estable, apoiada no traballo de asociacións como Cultura M de Meira, IESCHA de Vilalba, Falcatrueiros de Monterroso, Petapouco e A Destempo da Fonsagrada ou A Unión de Sarria.
Cargando ...
