Monforte licita novas melloras viarias en Piñeira por máis de 280.000 euros

O Concello de Monforte sacou a contratación dous novos proxectos de renovación de firmes en Piñeira cun investimento de 281.595 €. As actuacións forman parte do plan municipal de mellora de infraestruturas viarias presentado este ano, que supera o millón de euros e inclúe intervencións tanto no casco urbano como na zona rural.
Un dos proxectos céntrase na estrada que comunica os núcleos de As Bodegas e A Regueira. A actuación abarcará preto de 780 metros de vía e contempla a reparación das zonas deterioradas, a achega de novos materiais para reforzar a base, a extensión dunha nova capa de rodadura e a renovación da sinalización horizontal.
A segunda intervención executarase en dous viarios que enlazan o lugar de O Bosque coa contorna do Reboredo. Neste caso actuarase sobre máis de 1,6 quilómetros de pistas municipais, onde tamén se renovará o pavimento e se acondicionarán distintos elementos da vía, incluído un redutor de velocidade xa existente.
As dúas licitacións foron aprobadas pola Xunta de Goberno Local e permanecen publicadas na Plataforma de Contratación. O prazo para presentar ofertas remata o 29 de xuño e o tempo previsto para executar cada obra é dun mes.•