A banda chega á vila tras consolidarse como unha das formacións galegas con maior proxección
As festas de San Xoán de Sarria afrontan este sábado a súa derradeira gran xornada tras varios días marcados pola elevada participación cidadá, as altas temperaturas e unha intensa programación de actividades culturais, musicais e tradicionais. O principal reclamo do peche festivo será o festival Vibra Xoán, que converterá o Campo do Río no epicentro da celebración cun cartel encabezado por The Rapants.
A actuación da banda está prevista para as 23.30 horas, despois do concerto de Mrs. Fine, mentres que a sesión de Duendeneta DJ’s prolongará a festa ata ben entrada a madrugada. O acceso será gratuíto, nunha aposta do Concello por reforzar a oferta musical das patronais.
The Rapants converteuse nos últimos anos nun dos nomes máis destacados da música galega actual. Procedente de Muros, o grupo combina rock, pop e sons alternativos cun estilo propio que lles permitiu reunir milleiros de seguidores e actuar nos principais festivais do país. Os seus directos caracterízanse pola enerxía sobre o escenario e pola conexión co público, factores que os levaron a consolidarse como unha das bandas galegas de maior crecemento recente.
Co concerto do sábado, Sarria despedirá unha edición das súas patronais que volveu situar a vila como un dos grandes referentes festivos do inicio do verán na provincia.•
Cargando ...
