O Concello de Monforte puxo en marcha unha nova edición do Obradoiro Dual de Emprego A Pinguela, que durante os próximos nove meses ofrecerá formación e experiencia laboral a vinte persoas desempregadas. O alcalde, José Tomé, recibiu aos participantes nas instalacións da Escola Obradoiro, onde tamén se incorporou o equipo encargado da dirección, docencia e administración do proxecto.
A iniciativa, financiada pola Consellería de Emprego, Comercio e Emigración coa colaboración municipal, combina aprendizaxe teórica e práctica remunerada nas especialidades de carpintería e moble e de pavimentos e albanelería de urbanización. Ademais dos alumnos o programa permite a contratación de persoal técnico e administrativo, sumando un total de 24 postos de traballo.
Durante o acto de presentación, o rexedor animou aos participantes a aproveitar esta etapa formativa para mellorar a súa cualificación profesional e aumentar as posibilidades de acceso ao mercado laboral. O programa inclúe tamén incentivos á contratación que facilitarán a incorporación do alumnado a empresas unha vez rematada a formación.
Os traballos previstos centraranse na mellora das instalacións da propia Escola Obradoiro e na recuperación de espazos afectados polos incendios rexistrados en 2025.•
Cargando ...
