Tomé reivindica a renovación da Praza da Estación como unha mellora estratéxica para Monforte
A estación ferroviaria de Monforte de Lemos deu esta semana un novo paso no seu proceso de modernización coa apertura ao público da renovada Praza da Estación, un espazo que foi completamente remodelado dentro das actuacións de mellora da accesibilidade promovidas por ADIF. O alcalde monfortino, José Tomé, participou no acto de posta en servizo desta área, que recupera a súa funcionalidade tras varios meses de obras e que constitúe unha das intervencións máis visibles realizadas no recinto ferroviario.
A reforma permitiu transformar a configuración do acceso principal á estación, tanto para vehículos como para peóns. Os traballos incluíron a retirada do antigo pavimento de lastro e adoquín, substituído agora por unha nova superficie asfaltada, así como a ampliación das beirarrúas e a reorganización xeral dos espazos de circulación. Tamén se renovaron as infraestruturas de saneamento e instalouse un novo sistema de iluminación formado por sete farois de maior tamaño e tecnoloxía LED, deseñados para mellorar a visibilidade e a eficiencia enerxética do recinto.
A actuación exterior forma parte dun proxecto máis amplo que tamén afectou ao edificio de viaxeiros e ás plataformas ferroviarias. No inmoble principal renováronse as carpinterías exteriores, a cuberta e diversos elementos das fachadas, que foron rehabilitadas e pintadas. Ademais, acondicionouse o vestíbulo interior con nova iluminación e mellorouse o estado dos aseos públicos para adaptalos ás necesidades actuais dos usuarios.
No ámbito dos peiraos, as obras centráronse especialmente na eliminación de barreiras arquitectónicas. Un dos cambios máis significativos foi a resolución do desnivel existente entre o edificio e a plataforma principal mediante unha rampla de suave pendente que facilita os desprazamentos das persoas con mobilidade reducida. Tamén se renovou o pavimento dos andéns e acometéronse actuacións sobre marquesiñas, lucernarios, sistemas de drenaxe e impermeabilización das cubertas.
Segundo informou ADIF, o investimento destinado á modernización da estación de Monforte supera os dous millóns de euros. Esta intervención intégrase no programa de renovación integral do corredor ferroviario Ourense-Monforte-Lugo, unha infraestrutura estratéxica de 117 quilómetros para a que está prevista unha mobilización global de 626 millóns de euros.•
Cargando ...
