O Concello destina 150.000 euros á renovación do firme en dúas das principais rúas do parque empresarial
O Concello de Monforte abriu o proceso de contratación para executar unha nova actuación de mellora viaria no polígono industrial do Reboredo. O proxecto, cun orzamento de 150.000 euros, afecta a un tramo da rúa 1 e á totalidade da rúa 2, cunha superficie próxima aos 7.500 metros cadrados.
Os traballos contemplan o fresado da capa actual e a aplicación dun novo firme de aglomerado en quente, ademais da adaptación de pozos, arquetas e sumidoiros e da renovación da sinalización horizontal.
O alcalde, José Tomé, enmarcou esta actuación dentro da estratexia para reforzar a competitividade do parque empresarial. Lembrou que recentemente foron aprobados tanto o proxecto de ampliación do polígono como a adaptación da rede de saneamento vinculada á futura depuradora, actualmente en execución.
Segundo destacou o rexedor, o Reboredo experimentou unha importante transformación durante a última década, con melloras en iluminación, servizos e viario que favoreceron a ocupación da práctica totalidade das parcelas dispoñibles. O obxectivo é seguir creando condicións favorables para a implantación e crecemento de empresas no municipio.•
Cargando ...
