O Conservatorio Mestre Ibáñez abre os seus cursos musicais de verán

O Conservatorio Municipal Mestre Ibáñez de Monforte abriu o prazo de inscrición para os cursos de verán, que se desenvolverán no Edificio Multiusos en horario de mañá. A oferta está dirixida, con carácter xeral, a alumnado desde seis anos e inclúe niveis de iniciación e avanzado.
Cada solicitude permite elixir dúas materias por unha taxa de 25 euros. As reservas poden formalizarse no Rexistro do Concello ou a través da sede electrónica municipal, neste caso pendentes de confirmación por orde de entrada. As clases terán unha duración dunha hora e celebraranse por semanas, entre xullo e agosto.
O programa inclúe violín, piano, guitarra, saxofón, clarinete, frauta doce e travesa, trompeta, trompa, trombón, tuba, gaita, percusión moderna, percusión tradicional galega, canto, pandeireta e linguaxe musical. Para piano será preciso levar auriculares, e o alumnado menor de sete anos deberá achegar pinturas. En percusión moderna, solicítanse baquetas 5A e unha pelota de tenis.
O prazo de inscrición remata o 3 de xullo para as materias que comezan na primeira quenda. Para gaita, percusión tradicional, canto e pandeireta, saxofón, percusión moderna, piano do segundo grupo e linguaxe musical de agosto o límite será o 10 de xullo.•