A D.O. Ribeira Sacra promociona os seus viños en Bilbao

O Consello Regulador da Denominación de Orixe Ribeira Sacra avanzou esta semana no seu calendario de accións promocionais dirixidas a profesionais da hostalería, a restauración e a sumillería. O 6 de xullo celebrouse no Hotel Ercilla de Bilbao unha presentación destinada á Asociación de Sumilleres de Bizkaia, conducida por Juan José Figueroa Treus, presidente da Asociación Galega de Sumilleres e responsable do ciclo formativo impulsado pola denominación. Durante a sesión realizouse un percorrido polas características que definen os viños da Ribeira Sacra e pola singularidade dun territorio marcado pola viticultura heroica. Os asistentes coñeceron catorce referencias elaboradas por dez adegas, con mostras de branco e tinto pertencentes ás colleitas 2020, 2021, 2022, 2024 e 2025, representativas da diversidade varietal da denominación. Esta acción deu continuidade á primeira presentación, celebrada o 18 de xuño en Madrid, que reunira profesionais do sector e obtivera unha resposta moi positiva. “Queremos achegar a identidade dos nosos viños aos prescriptores que inflúen directamente na súa difusión”, sinalaron desde a organización. A través deste programa, o Consello Regulador busca reforzar o posicionamento da Ribeira Sacra en mercados clave e promover o coñecemento das súas elaboracións entre quen desempeña un papel esencial na súa recomendación. Tras a cita de Bilbao, a promoción continuará en Cantabria.•