A Pobra do Brollón acollerá o 11 de xullo a undécima edición da Feira Guímara, unha cita que conmemora a revolta medieval dos habitantes do municipio contra as inxustizas do Conde de Lemos. A programación desenvolverase no campo situado xunto ao río Rubín, antigo espazo feiral, e contará con actividades durante toda a xornada. Ás 11:30 será o pregón a cargo do historiador Manuel Leiras Camiño, seguido ás 12:00 da representación da revolta guímara, protagonizada pola rapazada e aberta á participación do público. A partir dese momento iniciarase un vermú animado pola banda The Tetas’ Van, que celebra quince anos de traxectoria. Entre as 12:00 e as 16:00 haberá unha demostración de oficios tradicionais, con cestería, torno de madeira e cantería a cargo do CENTRAD de Lugo. Ao longo do día permanecerán abertos máis de vinte postos de artesanía e produto local, con propostas que inclúen mel, téxtil, coiro, olería, madeira, cosmética natural e xoiaría. Para o xantar instalaranse mesas de uso libre baixo a sombra das árbores, ademais de postos de polbo, doces, filloas, queixos artesáns e produtos da cooperativa Tres Fuciños. Ás 17:00 celebraranse xogos populares, como a chave e a ra, e organizarase un concurso con categorías infantil e adulta, con inscricións o propio día. Ás 20:30 terá lugar o espectáculo infantil “Chafallas, a vendedora de fume”, de Cris Collazo, inspirado en contos e cantigas tradicionais galegas e portuguesas. A festa continuará pola noite cunha sesión musical a cargo do guímaro DJ Vizcaíno. A programación poderá consultarse na web do Concello da Pobra do Brollón.•
Cargando ...
