As altas temperaturas obrigan a extremar a prevención nos centros de traballo

O Instituto de Seguridade e Saúde Laboral de Galicia (Issga) mantén activa a campaña Traballo e calor, unha iniciativa orientada a previr os riscos que as altas temperaturas supoñen para as persoas traballadoras durante o verán. O obxectivo é minimizar os casos de estrés térmico, un problema que pode agravarse en actividades ao aire libre, con esforzo físico intenso ou nas que é preciso utilizar equipos de protección.
Entre as recomendacións difundidas figuran realizar pausas periódicas, hidratarse con frecuencia, empregar roupa lixeira e transpirable, protexer a cabeza da exposición directa ao sol e evitar comidas abundantes ou o consumo de alcohol e café durante a xornada. O Issga tamén anima a comunicar de inmediato calquera síntoma relacionado co exceso de calor.
A campaña lembra que as empresas deben adoptar medidas preventivas adaptadas ás condicións meteorolóxicas e ofrece asesoramento técnico para facilitar esa tarefa. Ademais, Galicia colabora coa iniciativa estatal do INSST, que reúne materiais e protocolos para afrontar fenómenos meteorolóxicos extremos e reforzar a seguridade nos centros de traballo..•