Monforte contará con 1,8 millóns para novas conexións urbanas

A campaña MercaSacra tamén recibirá apoio económico para impulsar o comercio de proximidade en Chantada

A Deputación deu luz verde a un novo paquete de investimentos que reserva boa parte dos fondos para actuacións no sur da provincia. A principal achega corresponde a Monforte, onde a institución provincial compromete unha colaboración plurianual de 1,8 millóns de euros para executar novas conexións urbanas entre 2026 e 2028. O proxecto busca mellorar a mobilidade, incrementar a seguridade viaria e favorecer a accesibilidade mediante infraestruturas adaptadas ás necesidades actuais da cidade.
Outra das iniciativas destacadas terá como escenario Chantada, onde se apoiará economicamente a celebración de MercaSacra. A campaña combinará unha feira con presenza de artesáns, adegas e produtores agroalimentarios coa posta en marcha de accións para incentivar as compras nos establecementos comerciais, ademais de actividades culturais e familiares.
O conxunto de acordos aprobados mobiliza 2,7 millóns de euros destinados tamén a reforzar a cooperación cos concellos, apoiar o tecido económico e mellorar servizos públicos. Segundo a voceira do Goberno provincial, Pilar García Porto, estas actuacións pretenden contribuír ao desenvolvemento da provincia e impulsar a actividade económica local.•