O BNG reafirma o seu rexeitamento á ponte do Malecón e pide á Xunta que paralice o proxecto

O BNG reiterou esta pasada semana a súa oposición ao proxecto da nova ponte prevista sobre o río Cabe, no paseo do Malecón de Monforte, e reclamou á Xunta que paralice definitivamente a actuación. O deputado autonómico Iago Suárez cuestionou a autorización emitida pola Dirección Xeral de Patrimonio e sostivo que a infraestrutura non responde ás necesidades reais de mobilidade da cidade, ademais de supoñer un forte impacto sobre a contorna natural e patrimonial.
Os nacionalistas defenden que existen alternativas para mellorar o tráfico sen executar unha obra que consideran innecesaria e lembran que xa trasladaron esta posición tamén ao Congreso a través do deputado Néstor Rego. Suárez pediu ao Goberno galego que empregue os mecanismos dos que dispón para impedir a construción da ponte.
Por outra banda, o BNG de Monforte respondeu ás críticas pola presenza dos seus representantes na inauguración do Festival do Viño da Ribeira Sacra. O portavoz municipal, Manuel Luaces, asegurou que participar nun acto de apoio ao sector vitivinícola “é perfectamente compatible” coa posición do Bloque respecto ao proxecto urbanístico e coa defensa do Malecón. A formación insiste en que continuará respaldando iniciativas beneficiosas para a cidade sen renunciar á súa oposición ao proxecto da ponte.•