O PSdeG levou ao Pleno unha iniciativa para frear os cambios na atención primaria

A iniciativa pide recuperar o modelo anterior, reforzar o rural e abrir o diálogo cos profesionais sanitarios

O Grupo Provincial Socialista logrou sacar adiante no último pleno da Deputación de Lugo unha moción na que reclama á Xunta de Galicia a retirada do decreto que reorganiza a atención primaria os sábados en horario de mañá. A iniciativa foi aprobada cos votos favorables do PSdeG, do BNG e do deputado non adscrito, mentres que o Partido Popular se posicionou en contra da proposta durante o debate plenario.
O texto defende a recuperación do modelo asistencial anterior ao considerar que a nova regulación supón un recorte na atención sanitaria de proximidade, ao concentrar a actividade nos Puntos de Atención Continuada (PAC) e reducir a asistencia prestada nos centros de saúde durante as mañás dos sábados. Segundo os socialistas, esta reorganización afecta de maneira especial aos concellos do rural, onde o envellecemento da poboación, a dispersión xeográfica e a falta de transporte fan máis difícil o acceso aos servizos sanitarios.
A moción aprobada sostén tamén que o decreto foi elaborado sen consenso cos profesionais da sanidade e advirte de que incrementa a presión asistencial sobre uns PAC que xa funcionan con importantes limitacións de persoal. Neste sentido, a Deputación reclama a creación dun grupo de traballo no que participen representantes da atención primaria e destes dispositivos para avaliar as necesidades reais do sistema e formular propostas consensuadas que permitan mellorar a asistencia.
Outro dos puntos recollidos na iniciativa fai referencia á necesidade de reforzar a planificación sanitaria durante os meses de verán. O texto lembra que a provincia experimenta un importante aumento de poboación debido ao turismo, ao regreso temporal de emigrantes e á celebración de festas e eventos, circunstancias que elevan a demanda asistencial en numerosos municipios. Por iso, solicita que se habiliten recursos específicos para afrontar ese incremento de actividade sen deteriorar a calidade do servizo.
A proposta tamén insta ao Goberno galego do Partido Popular a situar o equilibrio territorial entre as prioridades da súa política sanitaria, reforzando a presenza de profesionais e servizos nas zonas con maiores dificultades demográficas.•