O Centro do Viño da Ribeira Sacra acolleu unha mesa redonda organizada pola asociación Semente Ribeira Sacra para abordar as posibilidades de emprendemento e desenvolvemento económico nas contornas rurais. A iniciativa serviu tamén para clausurar o Bono de Asesoramento destinado aos proxectos finalistas da undécima edición do Concurso de Proxectos Empresariais Semente Ribeira Sacra, un programa de acompañamento especializado impulsado coa colaboración da Axencia Galega de Desenvolvemento Rural (Agader).
Na mesa redonda “Oportunidades de negocio no rural” participaron representantes institucionais, empresas e emprendedores que compartiron experiencias sobre innovación e creación de actividade económica no rural. A directora xeral de Agader, Paz Rodríguez, destacou as liñas de apoio da Xunta destinadas a impulsar o emprego en sectores non agrarios, unhas axudas que permitiron respaldar 41 iniciativas empresariais, consolidar 474 postos de traballo e crear outros 39 novos.
Durante o encontro tamén se repasaron outras actuacións orientadas a favorecer o desenvolvemento do rural, entre elas o Plan Camiña Rural para mellorar a rede de camiños municipais e os procesos de mobilización e reestruturación de terras impulsados nos últimos anos en Galicia.•
Cargando ...
