O Goberno autonómico destaca o investimento en conservación e a singularidade do territorio antes da avaliación en Corea
A candidatura da Ribeira Sacra ao recoñecemento da Unesco será analizada esta fin de semana polo Comité de Patrimonio Mundial, reunido na cidade surcoreana de Busán. O presidente da Xunta, Alfonso Rueda, explicou que Galicia presenta unha proposta “sólida, rigorosa e novedosa” que pon o foco na singularidade do territorio e no valor do seu patrimonio hidráulico. Segundo indicou, nos últimos anos investíronse oito millóns de euros en actuacións de conservación e desenvolvéronse noventa intervencións en colaboración con distintas administracións. O conselleiro de Cultura, José López Campos, destacou que esta “candidatura de país” contribuíu a que a Ribeira Sacra “sexan un territorio máis vivo, coidado e recoñecido”. A delegación galega estará encabezada polo director xeral de Patrimonio Cultural, Ángel Miramontes, acompañado polo coordinador da candidatura, Mario Creciente, e contará tamén coa presenza do embaixador de España ante a Unesco, Miquel Iceta, xunto a representantes dos ministerios de Cultura e de Asuntos Exteriores. O Comité avaliará trinta e tres expedientes entre o venres e o luns, e a previsión é que a resolución sobre a proposta galega se coñeza “entre o domingo 26 e o luns 27”, segundo explicou López Campos. A candidatura será examinada por vinte e un Estados membros, que valorarán os atributos excepcionais dun territorio marcado polos seus canóns fluviais, polos sistemas tradicionais vinculados ao uso da auga e pola conservación de infraestruturas como muíños, centrais e saltos. Paralelamente ao proceso técnico, a Xunta desenvolveu actuacións de protección en igrexas, mosteiros, museos, castros e xacementos, co obxectivo de reforzar a posta en valor dun espazo cultural e natural único.
Cargando ...
