A Xunta e o Concello de Bóveda analizan o proxecto para acondicionar unha carballeira da localidade

A conselleira de Medio Ambiente e Cambio Climático, Ángeles Vázquez, reuniuse co alcalde de Bóveda, José Manuel Arias, para analizar o proxecto municipal destinado a acondicionar unha carballeira da localidade e convertela nunha área de lecer para o uso da veciñanza. Durante o encontro, a conselleira destacou a relevancia de promover actuacións que contribúan á preservación dos espazos naturais e animou ao Concello a solicitar as axudas anuais da Consellería, orientadas a impulsar solucións baseadas na natureza. Estas liñas de apoio permiten financiar intervencións en zonas públicas que reforcen a biodiversidade ou axuden a mitigar o efecto illa de calor mediante a creación de espazos con condicións ambientais favorables. Ademais, na reunión abordouse a situación da rede municipal de abastecemento, facendo fincapé na necesidade de reducir perdas de auga. O alcalde explicou que o Concello elaborou un documento técnico que está a ser analizado por Augas de Galicia para avanzar na mellora das infraestruturas.•