Antonio Fontenla foi distinguido co Premio Empresario Galego do Ano durante a última edición do Encontro da Toxa, un foro organizado por CESUGA que reúne cada verán representantes do tecido empresarial, institucional e académico para analizar os principais retos económicos de Galicia. O galardón recoñeceu a traxectoria do empresario coruñés, que presidiu a Confederación de Empresarios de Galicia entre 2001 e 2013 e continúa á fronte da Confederación de Empresarios da Coruña.
A entrega do premio congregou representantes do mundo económico e das administracións públicas, entre eles o alcalde de Monforte, José Tomé, quen felicitou ao homenaxeado e destacou a súa achega ao fortalecemento do tecido produtivo galego, á creación de emprego e á defensa dos intereses empresariais da comunidade ao longo de máis de dúas décadas.
O rexedor monfortino tamén puxo en valor a relación que mantén con Fontenla desde hai anos e aproveitou a súa presenza no encontro para adiantar que Monforte acollerá nos próximos meses un acto de carácter empresarial, aínda que sen concretar polo momento o contido nin a data da convocatoria. O Encontro da Toxa é unha das principais citas anuais para o debate económico.•
Cargando ...
