A mostra celebrarase do 3 ao 8 de agosto na rúa Cardeal como antesala das Festas Patronais
A rúa Cardeal volverá converterse no principal escaparate da artesanía coa celebración da XXVI Mostra Artelemos, que terá lugar entre o 3 e o 8 de agosto dentro da programación cultural de verán promovida polo Concello. A cita reunirá 32 profesionais procedentes da Ribeira Sacra, do resto de Galicia e doutras comunidades, que exhibirán e porán á venda creacións de disciplinas tan variadas como a cerámica, a olería tradicional, a cestería, a madeira, o vidro, a la, o coiro ou a ourivaría, entre outras especialidades.
A organización manterá un formato que combina a exposición comercial coa divulgación dos diferentes oficios artesáns. Ao longo das seis xornadas haberá demostracións en directo e obradoiros destinados tanto ao público infantil como aos adultos, permitindo coñecer as técnicas empregadas polos profesionais e participar na elaboración de distintas pezas. As actividades desenvolveranse en horario de mañá e tarde e será preciso formalizar a inscrición antes do seu inicio.
A inauguración oficial está prevista para o 3 de agosto ás doce do mediodía. A programación completarase con propostas dedicadas á olería de Gundivós e Figulus, á cestería, ao coiro, ao barro, ao feltrado e ao modelado, mentres os postos permanecerán abertos de 10.00 a 14.00 e de 18.00 a 22.00 horas.•
Cargando ...
