A primeira edición da Subida Ribeira Sacra de Chantada saldouse cun balance positivo tanto no plano deportivo como organizativo, recuperando para a comarca unha proba puntuable para o Campionato de España de Montaña. A competición, celebrada entre o 10 e o 12 de xullo baixo a organización de Chantada RS Motorsport en colaboración coa Escudería Valdeorras, reuniu a algúns dos mellores especialistas da disciplina e atraeu unha importante presenza de afeccionados, especialmente durante a xornada dominical.
O triunfo absoluto foi para o vasco Joseba Iraola, ao volante dunha Nova Proto NP01-2, tras marcar un tempo acumulado de 3:23.610 nas catro mangas disputadas, das que computaban as dúas mellores. O catalán Jordi Vilardell, cunha Nova Proto NP03, terminou na segunda posición, mentres que o ourensán Abraham Vázquez, pilotando unha Osella PA21-JRB, logrou o terceiro posto tras un intenso duelo co lucense José Antonio Alonso Liste, que competía cun Tatuus F3 T-318.
Na Categoría I, José Antonio López Fombona levou a vitoria co seu Audi DTM, remontando na segunda xornada para superar a Bernardo García de Castro. Pola súa banda, Adrián Artidiello dominou con claridade a Categoría III ao volante dun Silver Car S3.
A proba incluíu tamén o Trofeo Exclusive Auto-Talleres Convento para pilotos do ámbito autonómico, no que Yelco Álvarez foi o vencedor, por diante de Jorge Pérez e Alberto Otero.
A recuperación dunha cita do nacional na Ribeira Sacra foi posible grazas ao apoio da Xunta de Galicia, a Deputación de Lugo e o Concello de Chantada. A organización destacou o correcto desenvolvemento do dispositivo de seguridade e a elevada resposta do público, nunha estrea que reforza as opcións de continuidade dunha proba chamada a consolidarse no calendario estatal.•
Cargando ...
