A apertura coincide coa chegada dun novo taller mecánico á área empresarial
O Polígono Industrial do Reboredo deu este mes un novo paso no seu proceso de expansión coa entrada en funcionamento do novo aparcadoiro municipal e coa apertura do taller mecánico DND, dúas actuacións que reforzan os servizos e a actividade da principal área empresarial de Monforte. A coincidencia de ambos fitos, producidos o mesmo día, foi destacada polo Concello como unha mostra do momento de crecemento que atravesa o recinto industrial.
O novo estacionamento, construído cun investimento municipal superior aos 305.000 euros, ocupa unha superficie de 6.400 metros cadrados e triplica a capacidade da antiga zona de aparcamento. As instalacións dispoñen de 17 prazas para camións e 64 para turismos, ademais de iluminación LED, videovixilancia, zonas verdes, fontes de auga e catro prazas preparadas para a futura recarga de vehículos eléctricos, pendentes da correspondente licitación para a súa posta en servizo.
Coincidindo coa apertura desta infraestrutura, iniciou a súa actividade o taller mecánico DND, promovido por tres socios e especializado en servizos de reparación. O alcalde, José Tomé, asistiu á inauguración do novo taller e resaltou o atractivo do polígono para novos proxectos empresariais.•
Cargando ...
