O Partido Popular de Monforte reuniu esta semana a afiliados e simpatizantes nun encontro de traballo encabezado pola presidenta local, Katy Varela, no que tamén participou o vicepresidente provincial da formación e deputado no Congreso, Francisco Conde. A cita serviu para analizar a situación política actual e preparar a organización do partido de cara ao próximo curso, no que están previstas novas convocatorias electorais.
Durante a reunión, os responsables populares fixeron balance dos últimos meses e defenderon que tanto o Goberno central como o executivo municipal atravesan unha etapa marcada pola polémica. Varela sostivo que o PP representa a alternativa política tanto en España como en Monforte e animou á militancia a intensificar o traballo nos vindeiros meses para afrontar o novo escenario electoral.
Pola súa banda, Francisco Conde criticou a situación do Executivo estatal e asegurou que o seu proxecto perdeu estabilidade parlamentaria. A presidenta local tamén reiterou as críticas do partido á continuidade de José Tomé á fronte da Alcaldía e afirmou que o obxectivo da formación é ofrecer unha alternativa de goberno na cidade.•
Cargando ...
