Alfonso Villares reclama á institución provincial que aclare o seu compromiso coa Fundación dos Ferrocarrís de Galicia
A situación das achegas económicas ao Museo do Ferrocarril de Galicia (Muferga) abriu un novo desencontro entre a Xunta de Galicia e a Deputación de Lugo. O delegado territorial e presidente do Padroado da Fundación dos Ferrocarrís de Galicia, Alfonso Villares, remitiu un escrito á institución provincial no que solicita que defina con claridade o seu compromiso coa entidade e faga efectiva a contribución correspondente ao exercicio 2025, lembrando ademais que os representantes provinciais non participan nas reunións do Padroado desde setembro de 2024.
Alfonso Villares sostén que o museo monfortino precisa estabilidade para planificar a súa actividade e considera necesaria a implicación de todas as administracións que forman parte da Fundación. Tamén destacou que o resto dos integrantes do Padroado manteñen o seu respaldo ao proxecto e estudan asumir un maior esforzo económico para afrontar o incremento dos custos de persoal do museo.
A Deputación respondeu mediante un comunicado no que rexeita as críticas e asegura que continúa comprometida coa conservación do patrimonio ferroviario galego. Segundo explica, a achega de 2025 atópase actualmente en tramitación, unha vez recibida a documentación necesaria para iniciar a fiscalización previa ao pagamento, mentres que a correspondente a 2026 aínda non pode formalizarse porque a Fundación non presentou a solicitude polos procedementos establecidos.
En relación coa ausencia na reunión do Padroado celebrada o 30 de xuño, a institución provincial indica que a convocatoria coincidía co Pleno da Deputación de Lugo, circunstancia que impedía a asistencia dos seus representantes, e defende que sempre cumpriu coas súas obrigas como integrante da Fundación.•
Cargando ...
