A duodécima edición selecciona iniciativas relacionadas coa tecnoloxía, o sector agroalimentario e o aproveitamento dos recursos do rural
O Concurso de Proxectos Empresariais Semente Ribeira Sacra xa ten os dez finalistas da súa duodécima edición, á que concorreron 82 persoas. Delas, 63 completaron a inscrición, con iniciativas ligadas ao rural, á tecnoloxía, á produción agroalimentaria e á economía circular.
O xurado escolleu propostas para transformar leite en derivados artesanais; Reforestatron, un robot para recuperar solos queimados; unha iniciativa para aproveitar o bagazo da uva en produtos de valor engadido; e CNTEK, centrada na detección de micro e nanoplásticos na auga. Completan a relación Alambiqueiros da Sacra Terra, unha destilería ligada ao aproveitamento do bagazo; Data Defend Solutions, dedicada á ciberseguridade para pemes; e AdegaConnect, plataforma para dixitalizar a trazabilidade nas pequenas adegas.
Tamén pasan á final Biocaba, que propón un recubrimento biodegradable antifúnxico para froita; RuralTech Lab 360+, orientado á aplicación de tecnoloxía ao viñedo, á xestión da auga e á actividade agroganadeira; e Marcal Galicia, que pretende transformar cuncha de mexillón en carbonato cálcico para usos agrarios, gandeiros e industriais.
Os promotores dispoñen agora ata o 30 de setembro para entregar os proxectos completos. O xurado citará os finalistas o 7 de novembro no Parador de Turismo de Monforte, onde deberán defender as súas propostas. Os premios entregaranse esa mesma noite durante a cea de clausura.
O certame repartirá 20.000 euros entre os tres primeiros clasificados: 10.000 para o gañador, 6.000 para o segundo e 4.000 para o terceiro. O responsable do proxecto vencedor poderá acceder a un Executive MBA de EF Business School. Os dez finalistas terán, ademais, a posibilidade de participar nun plan formativo durante o primeiro semestre de 2027.•
Cargando ...
