O director xeral da Cooperativa Lemos-Celega destacou o papel de empresas, autónomos e traballadores no futuro da cidade
O pregón de José Manuel Rodríguez Fernández abriu esta semana as Festas Patronais de Monforte, que se prolongarán ata o domingo 16. O director xeral da Cooperativa Lemos-Celega centrou a súa intervención no papel das empresas, autónomos, gandeiros, comerciantes e traballadores no desenvolvemento económico e social da cidade.
Rodríguez repasou tamén lembranzas persoais das festas e reivindicou as posibilidades de Monforte para captar actividade empresarial e ofrecer oportunidades á mocidade. O pregoeiro dedicou parte do discurso ao sector primario e ao esforzo diario das familias gandeiras.
José Tomé explicou que a elección do empresario pretendía estender o recoñecemento ao conxunto do tecido produtivo local. O alcalde destacou ademais o peso que alcanzaron as Patronais no calendario festivo do interior galego e a súa programación gratuíta. O acto celebrouse na Casa do Concello coa presenza da Corporación e de veciñanza. Rodríguez, responsable tamén de Autos Lemos e Transportes Agustín, reivindicou o emprendemento.
Tras o pregón lanzouse o foguete desde o Campo de San Antonio e quedou inaugurada a iluminación artística. A programación musical comezou coa actuación de De Vacas na Praza de España.•
Cargando ...
