Foto Marlon.
As Festas Patronais de Monforte continúan este venres 14 cunha programación que combina música, tradición e actividades nas rúas. As celebracións deixaron xa varias citas destacadas desde o seu inicio, entre elas o concerto de Miss Caffeina, ademais das actuacións e propostas desenvolvidas nos diferentes escenarios habilitados no centro da cidade.
A música volverá ter un papel protagonista nas xornadas que restan. Marlon será un dos principais reclamos deste venres, mentres que o sábado 15, festividade da Virxe de Montserrat, Monforte celebrará o Día da Patroa cun programa no que se combinarán os actos tradicionais coa oferta musical. Walls será unha das actuacións destacadas da noite.
O domingo 16 chegará outra das citas que cada ano reúne numeroso público, coa presenza da orquestra Panorama. A última xornada manterá así o carácter festivo dunha programación que durante estes días leva a actividade a diferentes puntos da cidade.
As Patronais conservarán tamén algúns dos seus elementos máis tradicionais. Entre eles figuran os espectáculos pirotécnicos, cun protagonismo especial para os fogos sobre o río Cabe no Malecón, unha das citas habituais das festas monfortinas.•
Cargando ...
