A Xunta inicia o último treito da autovía entre Lugo e Sarria cun investimento de 37,7 millóns

O desdobramento abrangue 13,5 quilómetros entre Nadela e A Pobra de San Xiao e terá un prazo de 36 meses

A Xunta de Galicia iniciou este mes as obras para transformar en autovía os 13,5 quilómetros do corredor entre a glorieta de Nadela e o enlace da Pobra de San Xiao. O proxecto, cun investimento de 37,7 millóns de euros, completará a conexión entre Lugo e Sarria e terá un prazo de 36 meses.
A futura AG-22 será libre de peaxe e terá unha velocidade máxima de 120 quilómetros por hora. Os traballos inclúen dous novos viadutos sobre os ríos Chamoso e Neira, de 259 e 160 metros, respectivamente, ademais dos enlaces do Corgo e Maceda, un cruzamento baixo a A-54 e a ampliación de 13 pasos superiores e sete inferiores.
As primeiras tarefas céntranse na sinalización e roza dos terreos próximos ao futuro viaduto do Chamoso. Estímase que a vía soportará arredor de 8.000 vehículos ao día e dará servizo a unhas 100.000 persoas.
A conselleira de Vivenda e Planificación de Infraestruturas, María M. Allegue, visitou o inicio das obras xunto ao delegado territorial, Alfonso Villares. A actuación permitirá enlazar de forma máis directa coa A-6 e coa A-54 en Nadela e mellorar a seguridade e reducir os tempos de percorrido.•