Medio Rural e Bóveda avanzan na súa colaboración agroalimentaria

No encontro destacouse a importancia de avanzar na valorización das producións con calidade diferenciada

O director da Axencia Galega da Calidade Alimentaria, Martín Alemparte, reuniuse co alcalde de Bóveda, José Manuel Arias, para avaliar novas vías de cooperación destinadas a reforzar o sector agroalimentario. No encontro destacouse a importancia de avanzar na valorización das producións con calidade diferenciada, consideradas unha ferramenta clave para incrementar o valor engadido e fortalecer a vinculación coa orixe. Tamén se analizaron iniciativas relacionadas coa formación, a mellora das capacidades profesionais e a transformación dos produtos. Ademais, ambas partes estudaron manter a colaboración na Feira Outrora, que cada xullo promove gastronomía e tradicións locais. A Axencia aposta por unha visión integral que favoreza novas oportunidades económicas no rural.•