Arredor de 30 aeronaves e 60 participantes fixeron escala durante tres días no aeródromo das Lamas
A Volta Aérea á Península fixo de Monforte unha das súas bases principais. Unhas trinta aeronaves e arredor de 60 participantes chegaron o día 4 ao aeródromo das Lamas procedentes de Braga, dentro dun itinerario por España e Portugal.
Durante a estadía, ata o día 6, as instalacións monfortinas serviron como punto de partida para voos de navegación por distintos aeródromos galegos e pola costa. A actividade combinouse cun programa turístico que achegou as tripulacións ao patrimonio de Monforte e da Ribeira Sacra, incluída unha visita ao Museo do Ferrocarril de Galicia.
O alcalde, José Tomé, recibiu os participantes no aeródromo xunto ao presidente do Club Aerolemos, José Antonio Guitián. O rexedor destacou a proxección turística da cita e lembrou as recentes melloras no recinto, cun investimento municipal de 260.508,16 euros na pista e na vía de acceso.
A organización local correspondeu ao Club Aerolemos en colaboración co Concello. O aeródromo rexistra entre 300 e 500 operacións anuais e recibe aeronaves de distintos puntos de España, Portugal e Francia. Tras completar as xornadas en Monforte, a Volta partiu cara a Herrera de Pisuerga para continuar por Huesca e Cuenca, antes de concluír o percorrido o domingo 9 de agosto.•
Cargando ...
