A Xunta publicou no Portal de Contratos Públicos de Galicia a licitación do servizo de mantemento do equipamento sanitario da área de Lugo, A Mariña e Monforte de Lemos. O contrato, cun importe de 1.874.713,51 euros e unha vixencia inicial de 24 meses, contempla unha posible prórroga de ata tres anos, o que elevaría o valor estimado do procedemento a 3.718.440 euros.
A licitación, dividida en seis lotes, abrangue o mantemento dos equipos destinados ao coidado da saúde e do equipamento clínico complementario instalado no Hospital Universitario Lucus Augusti, no Hospital Público da Mariña, no Hospital Público de Monforte de Lemos e nos centros de atención primaria da provincia de Lugo.
Entre as tarefas recollidas no expediente figuran a resolución de avarías, o mantemento preventivo dos dispositivos, a substitución de equipos danados e o mantemento de software. O contrato inclúe tamén o mantemento dos equipos de esterilización, dos sistemas de produción de auga ultrapura para diálise e dos equipos de dosimetría do departamento de Radiofísica. Ademais, contempla o coidado de ecocardiógrafos, lavadesinfectacuñas e mesas cirúrxicas.
No ámbito das áreas cirúrxicas, prevese a realización de inspeccións visuais e probas de funcionamento diarias en desfibriladores, electrobisturís, lámpadas e mesas cirúrxicas. Nas áreas de esterilización, levarase a cabo a comprobación diaria de autoclaves, lavadoras, sistemas de tratamento da auga e sistemas de achega de produtos químicos.
As empresas interesadas en participar no procedemento teñen de prazo ata o 25 de setembro para presentar as súas ofertas.
Cargando ...
