Numerosos fieis volveron subir a pé ao santuario nunha cita marcada polas merendas campestres e a música
O Alto do Cesar volveu reunir esta semana centos de persoas na romaría dos Remedios, unha das citas máis populares do calendario festivo de Sarria. A celebración combina os actos relixiosos coas tradicionais merendas campestres nos prados próximos ao santuario.
O martes, festivo local, numerosos fieis subiron a pé desde primeira hora para asistir ás misas e prender velas no exterior da capela. A misa maior, ás 13.00 horas, deu paso á procesión acompañada pola Banda de Música da Comarca de Sarria.
A chuvia apareceu ao mediodía, unha vez rematado o percorrido relixioso, e obrigou a suspender o concerto da Banda. As precipitacións non impediron as comidas de familias e amigos, este ano con máis casetas e cubertas nos terreos para protexer mesas e participantes.
A festa continuou coa Florida Band e a charanga Os Sureños, mentres Principal completou a verbena. O mércores, segunda xornada dos Remedios, o programa incluíu misa maior e música de D’Kris e El Combo Dominicano.
A subida ao Alto do Cesar e as comidas arredor da capela manteñen unha estampa propia desta romaría sarriá.•
Cargando ...
