Monforte acolleu a celebración de San Caetano de Thiene, patrón dos xestores administrativos. Máis de 200 persoas reuníronse no Parador, entre profesionais, familiares e representantes institucionais, nunha xornada que incluíu unha visita a unha adega da Ribeira Sacra.
O encontro serviu para distinguir a traxectoria de varios membros do Colexio de Xestores Administrativos de Galicia. Sagrario García Martínez, María Capeáns Guzmán, César Pérez da Silva e María Emilia Rúa Fontarigo recibiron o recoñecemento polos seus 25 anos de colexiación, mentres José Fumega Hotellerie Fallois foi homenaxeado por cumprir medio século na entidade.
A elección de Monforte tivo tamén presenza nos discursos. A presidenta do Colexio, Pilar Otero Moar, lembrou o monfortino Acacio Saco, fundador da Gestoría Saco e referente da profesión na localidade. O acto contou coa participación do alcalde, José Tomé, e do xefe provincial de Tráfico en Lugo, Alberto Rodríguez.
A delegada en Lugo, Pilar Núñez, abriu a xornada, na que se abordou o labor destes profesionais na relación de particulares, autónomos e empresas coas administracións. Otero incidiu tamén na implantación territorial do colectivo e nas dificultades que a dixitalización dos trámites pode presentar para parte da cidadanía.•
Cargando ...
