O Concello da Pobra do Brollón deu por rematada a edición estival do programa de visitas guiadas ao patrimonio local cun balance de 191 participantes ao longo dos meses de xullo, agosto e setembro. Entre os asistentes contabilizáronse 39 menores, nunha iniciativa orientada á divulgación dos recursos naturais, arqueolóxicos e culturais do municipio.
Segundo os datos facilitados pola organización, máis da metade das persoas participantes procedían da propia comarca e doutros concellos da contorna, incluíndo tamén veciñanza do propio municipio. O resto dos visitantes chegou desde diferentes puntos de Galicia e doutras comunidades autónomas, con presenza destacada de persoas procedentes de Madrid e Cataluña. O programa rexistrou igualmente asistencia internacional, con visitantes chegados desde Alemaña, Italia e Arxentina.
A oferta deste verán incluíu percorridos pola Cova das Choias, o Castro de San Lourenzo, as Penas do Castelo e o conxunto formado polas adegas tradicionais e o miradoiro de Vilachá. Entre todas as propostas, a visita á Cova das Choias foi a que espertou unha maior demanda por parte do público.
Desde o programa lembran que o acceso á cavidade está restrinxido fóra das rutas organizadas co obxectivo de preservar os valores ambientais e as especies que habitan neste espazo. As visitas estiveron guiadas por Cristina Rodríguez.•
Cargando ...
