Foto CIGS.
CIG-Saúde denunciou a comezos de setembro a falta de camas no Hospital Público de Monforte e reclamou á dirección a reapertura da planta de Medicina Interna pechada durante o verán, pese á elevada ocupación.
A central asegura que as plantas funcionaron cunha ocupación de entre o 90% e o 100% e sinala que esta situación chegou a obrigar a suspender intervencións de Traumatoloxía por non dispoñer de camas para os ingresos. Tamén afirma que houbo pacientes trasladados entre plantas, mesmo pola noite, e que nalgún caso foi necesario derivalos a Lugo.
A denuncia sindical esténdese ao servizo de Urxencias. Segundo os datos difundidos pola CIG, durante o verán atendeu unha media de 57 persoas ao día, con xornadas nas que se alcanzaron as 90, sen que se reforzase o persoal sanitario. A organización sindical sostén que o incremento estacional da poboación aumenta a presión asistencial nesta época.
Ante esta situación, CIG-Saúde pide abrir a planta de Medicina Interna e incrementar os efectivos. O sindicato considera incompatible manter camas fóra de servizo cando a ocupación é elevada e vincula a falta de capacidade coa suspensión de operacións e cos movementos de pacientes denunciados.•
Cargando ...
