Lugo perde máis de 4.000 autónomos desde 2018

A provincia pechou agosto con 30.582 afiliados ao RETA, un 0,61% menos que hai un ano, fronte ao crecemento rexistrado en Galicia e España

A provincia de Lugo mantén unha evolución negativa no traballo por conta propia. Agosto pechou con 30.582 afiliados ao Réxime Especial de Traballadores Autónomos (RETA), un 0,61% menos que no mesmo mes de 2025, segundo os datos da Seguridade Social. A caída contrasta coa evolución de Galicia, onde as afiliacións medraron un 0,10% interanual, e coa do conxunto de España, que rexistrou un incremento do 1,87%.
A tendencia resulta máis acusada ao ampliar o período de análise. Desde agosto de 2018, Lugo perdeu 4.270 autónomos, o que representa un descenso superior ao 12%. O emprego por conta propia conserva un peso moi relevante no tecido económico lucense, especialmente no comercio e na agricultura.
Os datos de agosto presentan ademais unha evolución diferente á do conxunto da afiliación. Lugo sumou 131.865 afiliacións medias á Seguridade Social, un 1,70% máis que un ano antes. No réxime xeral o incremento alcanzou o 2,46%, mentres que o RETA continuou perdendo efectivos. Dentro de Galicia, A Coruña tamén retrocedeu entre os autónomos, un 0,32%, fronte aos aumentos anuais de Pontevedra, do 0,89%, e Ourense, do 0,26%.
A perda de autónomos chegou esta semana ao Senado. A Comisión de Traballo e Economía Social aprobou este mércores, sen votos en contra, a iniciativa presentada polo PP para reclamar ao Goberno central un plan específico para a provincia. A proposta recibiu o apoio dos populares e a abstención do PSOE.
A moción, defendida polos senadores lucenses José Manuel Balseiro e Juan Serrano, pide avaliar as causas da caída e determinar en que sectores se concentra, así como o peso do relevo xeracional e os obstáculos para a continuidade dos negocios. Reclama medidas de apoio ao autoemprego, á formación e á dixitalización.
Os populares defenden tamén actuacións en ámbitos de competencia estatal como as cotizacións, a Seguridade Social, a protección social, parte da fiscalidade e as cargas administrativas. Durante o debate, Balseiro vinculou a competitividade empresarial coa situación das infraestruturas viarias e ferroviarias da provincia.
Galicia contabilizou en agosto 205.244 afiliados ao RETA. Lugo concentra 30.582 e é, xunto coa Coruña, unha das dúas provincias galegas cun descenso interanual, malia rexistrar entre xullo e agosto un lixeiro incremento do 0,02%.•