A rúa Vigo abriu esta semana unha nova fase de actuacións que continuará pola avenida de Galicia, rúa Chantada e Calvo Sotelo
Monforte iniciou esta semana unha nova fase do plan municipal de mellora da rede viaria, que mobiliza 1,06 millóns de euros en dez proxectos repartidos entre o núcleo urbano e as parroquias, con actuacións xa rematadas, en execución ou previstas para as próximas semanas. Os primeiros traballos afectan á rúa Vigo, no barrio do Casar, onde se renova o firme entre a estrada da Vide e o propio barrio, cun investimento de 122.734 euros.
A principios da próxima semana está previsto actuar na avenida de Galicia e na rúa Chantada, entre o cruzamento coa rúa Cardeal e a rotonda do Hórreo. A intervención, adxudicada por 174.279 euros, inclúe fresado, nova pavimentación e renovación da sinalización. Xa en outubro, entre os días 5 e 9 se o tempo o permite, será a quenda da rúa Calvo Sotelo. Neste caso investiranse 182.735 euros para renovar o firme, reparar afundimentos e actualizar a sinalización.
O programa urbano complétase cunha actuación de 11.214 euros no inicio da rúa Pintor Luis Seoane e co acondicionamento da zona de Montepando-Bouza Brey, onde se asfaltará unha pista en forma de Z e dous ramais que comunican vivendas illadas. Estes traballos foron adxudicados por 73.996 euros.
As obras avanzan tamén no rural. En Piñeira está en execución a mellora da vía que comunica a estrada de Sober co acceso ao polígono do Reboredo, cun investimento de 177.770 euros. A esta actuación sumaranse dúas pistas desde O Bosque ata a rúa Reboredo, por outros 103.826 euros, polo que o investimento na parroquia supera os 281.000 euros.
En Ribas Altas xa se preparan os traballos para asfaltar a marxe dereita da estrada de Monforte a Lugo, cun orzamento de 104.037 euros, completando a intervención realizada o pasado ano na outra beira. Pola súa parte, as melloras previstas en Marcelle e San Xoán de Tor, valoradas en 91.956 euros, xa están rematadas.
O plan reserva ademais 32.395 euros para dous accesos a Guntín, 19.705 para a intersección das rúas Amador López Espinosa e Ourense e 48.869 para construír unha pista multiusos nas Cruces.
O alcalde, José Tomé, supervisou o mércores o inicio das obras da rúa Vigo acompañado por Gloria Prada e José Luis Losada. O rexedor enmarcou estas intervencións na planificación municipal para renovar progresivamente os firmes e mellorar a seguridade e as comunicacións tanto na cidade como nas parroquias.•
Cargando ...
