O certame vitinícola, celebrado anualmente en Monforte de Lemos, figura entre os galardoados na sétima edición dos recoñecementos promovidos polo Consello Provincial de Turismo
O Festival do Viño da Ribeira Sacra foi seleccionado como un dos proxectos distinguidos na sétima edición dos Premios á Excelencia do Turismo e a Gastronomía da provincia de Lugo, uns galardóns promovidos pola Deputación que recoñecen iniciativas vinculadas á promoción turística, cultural e gastronómica do territorio.
O fallo foi acordado polo Consello Provincial de Turismo nunha reunión celebrada no Pazo de San Marcos. Na categoría denominada Lugo Cambia ao Turismo Lucense, o xurado decidiu repartir o recoñecemento entre o evento monfortino e o Encontro Internacional de Torneiros da Madeira de Xermade, dúas propostas consideradas referentes nas súas respectivas áreas.
A elección do festival celebrado en Monforte de Lemos supón un novo respaldo para unha cita que se consolidou durante os últimos anos como unha das principais ferramentas de promoción da Ribeira Sacra. O evento converte o Paseo do Malecón nun escaparate dos viños elaborados baixo a denominación de orixe, pero tamén da oferta gastronómica, do patrimonio histórico e das posibilidades enoturísticas da comarca.
A edición deste ano reuniu arredor de trinta adegas das diferentes subzonas da denominación e desenvolveu un programa complementario integrado por degustacións comentadas, actividades formativas, concertos, propostas para público infantil e percorridos vinculados ao mundo do viño. A celebración ten ademais un significativo impacto na actividade económica local ao atraer visitantes nun período previo á tempada turística máis intensa do verán.
Xunto ao recoñecemento concedido ao festival monfortino, o Consello Provincial de Turismo premiou na categoría gastronómica á Festa da Enfariñada de Trabada, unha cita centrada na recuperación e divulgación dun prato tradicional da Mariña lucense. Pola súa banda, o galardón ao Turismo Sostible recaeu en Santaballa, Territorio de Memoria e Sostibilidade, un proxecto impulsado en Vilalba que combina unha ruta arqueolóxica con actividades ligadas á recuperación da memoria da emigración.
Segundo explicou a vicepresidenta do Consello Provincial de Turismo e deputada de Promoción do Territorio e Turismo, Pilar García Porto, estes premios buscan apoiar iniciativas capaces de reforzar a visibilidade da provincia e contribuír ao desenvolvemento económico ligado ao sector. A responsable provincial destacou que este tipo de propostas favorecen a atracción de visitantes e incentivan a creación de produtos adaptados ás novas demandas turísticas.
A decisión do órgano consultivo deberá ser ratificada agora pola Xunta de Goberno, paso previo á súa publicación oficial no Boletín Oficial da Provincia.•
Cargando ...
