O Concello de Sober puxo en marcha unha nova convocatoria de axudas dirixidas a facilitar o acceso aos estudos e aliviar os gastos derivados do inicio do curso académico entre as familias e estudantes do municipio. O programa está destinado a veciños empadroados que cursen ensinanzas desde Infantil e Primaria ata Bacharelato, Formación Profesional ou universidade.
As subvencións cobren a adquisición de libros e material escolar, así como determinados custos relacionados coa matrícula dos alumnos. As contías máximas varían segundo a etapa educativa. O alumnado de Infantil e Primaria poderá recibir ata 100 euros; os estudantes de ESO, FP e Bacharelato, ata 125 euros; e os universitarios, ata 250 euros.
Entre as condicións establecidas figura a residencia efectiva no concello e a acreditación da matrícula no curso 2026-2027. As solicitudes poderán formalizarse ata o 15 de outubro, tanto de maneira presencial nas dependencias dos Servizos Sociais municipais como a través da sede electrónica do Concello.•
Cargando ...
