A Deputación de Lugo acolleu a presentación dun estudo promovido polo Eixo Atlántico sobre o desenvolvemento do enoturismo en Galicia e na Rexión Norte de Portugal. O traballo, elaborado por Montserrat Cruz, vicerreitora do Campus de Ourense da Universidade de Vigo, analiza a situación actual e formula actuacións orientadas a incrementar o impacto económico desta actividade.
No caso da Ribeira Sacra, o informe destaca a relevancia dun territorio que concentra máis de 96 adegas, unhas 2.500 hectáreas de viñedo e arredor de 2.000 viticultores. Entre as conclusións recollidas figura que a estancia media dos visitantes adoita situarse entre dous e tres días.
Para aumentar ese tempo de permanencia, o documento propón distribuír mellor as actividades ao longo do ano, reforzar a identidade turística da zona e incorporar recursos dixitais que faciliten a planificación das visitas. Tamén inclúe medidas relacionadas coa formación dos profesionais e coa cooperación institucional.
As recomendacións concretas pasan por ordenar a oferta de aloxamentos, promover paquetes turísticos e fixar unha axenda compartida de eventos. Carmela López destacou durante o acto que os visitantes poden coñecer “a vida natural do noso territorio” a través da cultura do viño.•
Cargando ...
