A Asociación de Empresarios da Ribeira Sacra e a empresa galega Aldealista puxeron en marcha o 12 de outubro o Bono de Impacto Ribeira Sacra, para atraer profesionais e favorecer a remuda nos negocios da comarca.
A iniciativa ofrece ata 200 euros para cubrir gastos de viaxe, aloxamento e manutención das persoas preseleccionadas para entrevistas presenciais en empresas da comarca. Con esta achega preténdese reducir o custo que supón desprazarse ao territorio para coñecer unha oportunidade laboral antes dun posible traslado ao medio rural.
Aldealista asumirá a xestión mediante «A Chave Aldealista», unha ferramenta vinculada ao seu programa de Transición Rural. A través dela buscarase conectar persoas interesadas en vivir e traballar no rural con empresas que necesitan incorporar persoal ou atopar quen continúe á fronte da súa actividade.
A proposta inclúe, deste xeito, tanto ofertas de emprego como posibilidades de emprendemento ou sucesión empresarial. Os seus impulsores queren responder á falta de profesionais en determinados negocios e ás dificultades para asegurar a continuidade de establecementos locais.
Juan Carlos Pérez, impulsor de Aldealista, sinala que existen empresas con vacantes, negocios sen sucesores e persoas que desexan trasladarse ao rural pero descoñecen as oportunidades dispoñibles. A colaboración coa asociación empresarial pretende facilitar o contacto entre estes perfís e favorecer proxectos de vida e traballo na Ribeira Sacra, un territorio que aspira a ser recoñecido pola Unesco como Patrimonio da Humanidade.•




