A fondo: Uns 250 veciños e veciñas dunha ducia de asociacións do sur da provincia participan esta primavera no Coñece a túa provincia

• Na segunda edición do programa de viaxes gratuítas da Deputación de Lugo Coñece a túa provincia, se beneficiarán máis de 3.000 persoas de 135 asociacións e colectivos lucenses esta temporada

• Redacción- MONFORTE.
Preto de 250 veciños e veciñas dunha ducia de asociacións do sur da provincia participarán esta primavera na segunda edición do programa de viaxes gratuítas da Deputación de Lugo Coñece a túa provincia, do que se beneficiarán máis de 3.000 persoas de 135 asociacións e colectivos lucenses esta temporada.
A Asociación Albores Saúde Mental de Monforte foi a primeira desta zona en aproveitar estas viaxes pola provincia, visitaron en primeiro lugar o Centro de Produción de Audiovisuais da Deputación, para despois emprender rumbo cara A Mariña para coñecer o Val de Lourenzá e Mondoñedo. Visitaron a igrexa parroquial do Mosteiro de Lourenzá e tamén o centro de interpretación da Faba e a cooperativa Terras da Mariña. Logo achegáronse ao casco histórico de Mondoñedo con paradas na Catedral, na Fonte Vella, o Seminario e outros puntos de interese da cidade episcopal.
Entre as asociacións do sur da provincia que participarán no Coñece a túa provincia estes meses de abril, maio e xuño están a Asociación de Familiares e Enfermos de Alzheimer de Monforte, a Asociación de Veciños de Santa María da Cabeza da Pobra de Brollón, a asociación Cultural e Xuvenil Castro Rey de Lemos de Paradela, os Artesanos de Samos, a Asociación de Mulleres Rurais O Noso Lar, a Asociación de Veciños San Román de Moreda de Pantón, a Asociación Veciñal e Cultural Cabalo Branco de Santiago de Cangas de Pantón, a UGT de Lemos, a APA do Colexio Público de Pantón, a Asociación de Veciños de Saa do Páramo e a Asociación O Piñeiro Santa María de Tuiriz de Pantón.
O Presidente da Deputación, José Tomé Roca, destacou que a reedición deste programa, incluído no Plan de Impulso da Economía da Provincia, “ten como obxectivo seguir favorecendo o coñecemento da provincia entre os propios veciños e veciñas, e apoiar a actividade da hostalería, do turismo e do comercio fronte ao impacto da pandemia, ao tempo que seguimos consolidando un modelo de turismo de calidade, sostible, con capacidade para atraer visitantes ó longo do ano, que pon en valor o patrimonio e que mantén e crea emprego, sobre todo no rural”.
A primeira parada de cada viaxe realizase sempre nun espazo de titularidade provincial, como pode ser o Pazo de San Marcos, o Centro de Produción Audiovisual, a Granxa Gayoso Castro, o Centro de Interpretación Terras do Miño ou o Mazo de Santa Comba.
A institución provincial recibiu 170 solicitudes durante o período de inscrición, das que foron admitidas 135. Ademais, aceptáronse 32 entidades que entraron na listaxe de agarda.
O programa Coñece a túa Provincia inclúe, de balde, o transporte para os traslados de ida e volta dende o lugar ou lugares de orixe, póliza de seguros de viaxeiros, menú de xantar, e entradas e visitas a diferentes lugares de interese da provincia de Lugo. Estas visitas serán realizadas por profesionais que contan coa habilitación de guía oficial de turismo de Galicia e polo persoal de atención ao público nos diferentes museos, empresas ou obradoiros sinalados nos itinerarios do programa. •

A %d blogueros les gusta esto: