Opinión: enquisas e noticias

Gonzalo L. Torres

Editor de EnComún

Son tempos electorais, e por tanto, tempos en que as propostas das diferentes candidaturas e as enquisas electorais convértense nas principais noticias dos medios de comunicación. E unha noticia debería ser, pola súa propia natureza, informativa. É dicir, as propostas políticas, tiñan que servir para dar a coñecer a formulación de cada unha das alternativas ideolóxicas que optan a gobernarnos durante os próximos catro anos. Debésennos mostrar as súas ideas para Galicia, e tamén detallar de maneira concreta, como pretenden levar a cabo ditas ideas, e por suposto en que repercutirán as súas propostas no territorio no que vivimos. É fácil, queremos coñecer o seu plan para Galicia, a súa estratexia e táctica para materializalo. Con todo, xa sabemos que as propostas electorais, se teñen algunha finalidade, é puramente propagandística e se mo permiten, cortoplacista. Trátase de crear noticias que teñan máis impacto e difusión que as dos adversarios. Noticias baleiras de contido, pero útiles para os seus propoósitos. Como o son as enquisas, que nestes días atafégannos, non xa as dos distintos medios de comunicación, senón agora tamén as do famoso CIS de Tezanos. E o peor non é a enquisa, senón a súa manipulación informativa. Convídolles a facer unha procura na internet, sobre a mesma, en relación ás eleccións galegas, e máis aló do súa eficacia preditiva ou da súa intencionalidade, o rechamante é que onde uns medios ven ao PP perdendo a maioría absoluta, outros observan, cos mesmos datos, que a maioría consolidase. Enquisas e noticias, pero todo dependendo da cor do cristal a través do cal se mire. E despois, o silencio. •

A %d blogueros les gusta esto: