A Sociedade Deportiva Río Cabe foi escollida pola Real Federación Española de Golf como sede do Campionato de España Masculino de Pitch & Putt 2024, un evento de gran importancia que terá lugar nos días 11 e 12 de maio no campo monfortino.
Esta elección é unha noticia moi positiva para Monforte, pois durante esa semana a cidade recibirá aos 108 xogadores participantes, así como aos seus acompañantes e aos afeccionados que se acheguen para presenciar a competición.
O venres 10 terá lugar a xornada de adestramento oficial. O sábado 11 disputaranse dúas roldas de 18 ocos, mentres que o domingo haberá unha rolda máis que determinará o campión de España deste ano.
A Tenente de Alcalde de Monforte, Gloria Prada Rodríguez, participou na rolda de prensa, celebrada no Parador de Turismo, na que se deron a coñecer os detalles da proba, e destacou que o campionato terá un gran impacto no sector hostaleiro e de restauración, ademais de ofrecer unha oportunidade única para dar a coñecer o valor turístico, patrimonial e gastronómico da zona. Na presentación tamén participaron o presidente do Club Río Cabe, José Ángel Pérez Reñones, e a súa xerente, María Eugenia Graña Rosales. O campo de golf da Sociedade Deportiva Río Cabe, situado en Ribas Altas, Monforte de Lemos, ofrece un percorrido plano e agradable para xogar. Conta con árbores próximas ás rúas dos ocos e lagos estratéxicos para dificultar o xogo, así como bunkers e greens amplos. A súa localización privilexiada nos arredores de Monforte, en relación coa Ribeira Sacra, convérteo nun punto de referencia para actividades deportivas e turísticas, tanto para visitantes como para a poboación local.•
