Monforte e O Saviñao, entre os enclaves culturais do Festival internacional Pórtico do Paraíso

•Este ciclo de música clásica inclúe por vez primeira localizacións na provincia de Lugo •O 7 de marzo, celebrarase un concerto na igrexa de Santo Estevo de Ribas de Miño, e o 13 a música desprazarase á igrexa de Santa María da Régoa, en Monforte

O sur de Lugo será escenario, por vez primeira, do Festival internacional Pórtico do Paraíso, que leva doce anos ofrecendo na provincia de Ourense concertos de música clásica a cargo de reputados intérpretes internacionais. No mes de marzo, Monforte e O Saviñao será as primeiras dúas sedes do Festival fóra de terras ourensás, logo de que a Deputación de Lugo se sumara á colaboración con este festival, cunha achega de 12.000 euros. A decisión de colaborar baseouse, segundo o presidente do organismo provincial, José Tomé, na idea que ten o festival “de unir o mellor da música clásica e o mellor do patrimono arquitectónico, e que mellor lugar que a Ribeira Sacra”.
O MELLOR DA MÚSICA CLÁSICA EN ESCENARIOS INCOMPARABLES DE LUGO E OURENSE
O 6 de marzo comezará o festival, coa actuación da Escolanía de Segovia no Templo da Vera Cruz, no Carballiño. O 7 de marzo terá lugar o primeiro concerto en terras lucenses, a cargo do arpista Andrew Lawrence-King, que terá como escenario a igrexa de Santo Estevo de Ribas de Miño, no Saviñao. O día 8, o festival volverá a Ourense, co concerto de violín de José Manuel Álvarez, na igrexa de Santo Anxo.
De novo na provincia de Lugo, o 13 de marzo celebrarase na igrexa monfortina de Santa María da Régoa o concerto de viola, violín e acordeón a cargo do trío Kosmos Ensamble. O Festival Pórtico do Paraíso rematará o día 15, coa actuación de Víctor Villagandos no Liceo de Ourense.•